சூடான காருக்குள் பாதிக்கப்பட்ட 6 மாத குழந்தையை குளிர்சாதனப் பெட்டியில் வைத்து காப்பாற்ற முயன்ற தந்தை; குழந்தை இறந்தநிலையில் பொலிஸாரால் கைது செய்யப்பட்டார்…!!
அமெரிக்காவைச் சேர்ந்த நபர் ஒருவர் தனது 6 மாத வயதான மகளை வெப்பம் மிகுந்த காருக்குள் வைத்து பூட்டிவிட்டு பல மணித்தியாலங்கள் மறதியாக இருந்த பின்னர், அக் குழந்தையை குளிர்சாதனப் பெட்டிக்குள் வைத்து காப்பாற்ற முயன்றுள்ளார்.
மேற்படி குழந்தை பின்னர் பரிதாபகரமாக உயிரிழந்த நிலையில் குழந்தையின் தந்தையான மைக்கல் தெட்போர்ட் கைது செய்யப்பட்டுள்ளார்.
33 வயதான மைக்கல் தெட்போர்ட், அண்மையில் ஒருநாள் காலை 9 மணியளவில் 3 மற்றும் 5 வயதான தனது பிள்ளைகள் இருவரை காரில் ஏற்றிச் சென்று சிறுவர் பராமரிப்பு நிலையத்தில் இறக்கிவிட்டார்.
வழக்கமாக தனது 3ஆவது பிள்ளையான ஃபேர்ன் எனும் 6 மாத குழந்தையையும் அவர் அப் பராமரிப்பு நிலையத்தில் விடுவார். ஆனால், அன்றைய தினம் அக்
குழந்தைக்கு காய்ச்சல் ஏற்பட்டிருந்ததால் அக் குழந்தையை சிறுவர் பராமரிப்பு நிலையத்தில் விடாமல் வீட்டுக்கு அழைத்து வந்தார்.
எனினும் அக் குழந்தையை காரிலிருந்து அவர் இறக்கவில்லை. அதன்பின் உறங்குவதற்குச் சென்ற அவர், பிற்பகல் 1 மணியளவிலேயே விழித்தெழுந்து தனது மகள் காருக்குள் இருப்பதை உணர்ந்தார்.
வெப்பம் மிகுந்த அத் தினத்தில் காருக்குள் மயங்கிய நிலையில் அக் குழந்தை காணப்பட்டது. வெப்பத்தால் பாதிக்கப்பட்ட அக் குழந்தையை குளிரான நிலையில் வைத்து பாதுகாக்கலாம் எனக் கருதிய மைக்கல் தெட்போர்ட் அக்
குழந்தையை குளிர்சாதனப் பெட்டிக்குள் வைத்தார்.
அதன் பின்னர் அவர் 911 எனும் அமெரிக்க சேவை இலக்கம் மூலம் அவசர சேவைப் பிரிவினரை அழைத்தார். அவசர சேவைப் பிரிவினர் அவ் வீட்டுக்கு வந்தபோது அக் குழந்தை இறந்துகிடந்தது.
இச் சம்பவத்தையடுத்து மைக்கல் தெட்போர்ட்டை பொலிஸார் கைது செய்தனர். அவர் மீது கைமோசக் கொலைக் குற்றச்சாட்டு சுமத்தப்பட்டுள்ளது. தற்போது அவர் 20,000 டொலர் பிணையில் விடுவிக்கப்பட்டுள்ளார்.
மைக்கல் தெட்போர்ட் தற்போது வேலையில்லாமல் இருப்பவர். அவர் முன்னர் ஆசிரியராக பணியாற்றினார். கடந்த வருடம் பாடசாலையில் அவர் பௌதிகவியல், இரசாயனவியல் ஆகியவற்றை கற்பித்தார் எனத் தெரிவிக்கப்படுகிறது.
மைக்கல் தெட்போர்ட்டின் தந்தை மேற்படி சம்பவம் தொடர்பாக கூறுகையில், எனது மகன் ஓர் அன்பான தந்தையாக விளங்கியவர். இச் சம்பவம் எவ்வாறு நடைபெற்றது என்பதை என்னால் நம்ப முடியவில்லை” எனத் தெரிவித்துள்ளார்.
Average Rating