முன்னாள் உலக அதிபார குத்துச்சண்டை சம்பியன் காலமானார்..!!
அதிபார குத்துச்சண்டையில் உலகின் முன்னாள் சம்பியன்களில் ஒருவரான டொமி மொரிஸன் தனது 44 ஆவது வயதில் ஞாயிறன்று இரவு காலமானார்.
அமெரிக்காவைச் சேர்ந்த டொமி மொரிஸன், 1993 ஆம் ஆண்டு ஜோர்ஜ் போர்மனை தோற்கடித்து உலக குத்துச்சண்டை அமைப்பின் (டபிள்யூ பி.ஓ.) உலக அதிபார சம்பியன் பட்டத்தை வென்றவர்.
1996 ஆம் ஆண்டு ஆர்தர் வீதர்ஸுடனான போட்டியில் பங்குபற்றுவதற்கு முன்னர் டொமி மொரிஸன் எச்.ஐ.வி. தொற்றுக்குள்ளாகியிருந்தமை கண்டுபிடிக்கப்பட்டதாக அறிவிக்கப்பட்டது. அதன்பின் அவரின் குத்துச்சண்டை வாழ்க்கை தடுமாறத் தொடங்கியது.
எனினும் தனக்கு எச்.ஐ.வி. தொற்று இல்லை எனக் கூறிய டொமி மொரிஸன், பலதடவை மீண்டும் குத்துச்சண்டை அரங்குக்கு திரும்ப முயன்றார். இறுதியாக 2008 ஆம் ஆண்டு அவர் உத்தியோகபூர்வமாக ஓய்வு பெற்றார்.
இந்நிலையில், ஞாயிறன்று இரவு அவர் காலமானதாக மொரிஸனின் குத்துச்சண்டை ஊக்குவிப்பாளரான டொனி ஹோல்டன் தெரிவித்துள்ளார். எனினும் இம்மரணத்துக்கான காரணத்தை ஹோல்டன் வெளியிடவில்லை. 1990 ஆம் ஆண்டு ‘ரொக்கி வீ’ எனும் குத்துச்சண்டை திரைப்படத்தில் சில்வெஸ்டர் ஸ்டாலோனுடன் டொமி மொரிஸன் நடித்திருந்தமை குறிப்பிடத்தக்கது.
Average Rating