மின்வெட்டு அறிவிப்பால் மக்கள் மத்தியில் குழப்பம்..!!
Read Time:4 Minute, 27 Second
நாடளாவிய ரீதியில் நேற்று நள்ளிரவு முதல் அமுலுக்கு வரும் வகையில் மின்துண்டிப்பு அமுல்படுத்தப்படும் என இலங்கை மின்சார சபையினால் அறிவிக்கப்பட்ட நிலையில் அதனை சில மணிநேரங்களில் மின் வலு மற்றும் புதுப்பிக்கத்தக்க அமைச்சு நிராகரித்தது. இதனால் நேற்று மாலை நாட்டு மக்களிடையே குழப்பகரமான நிலை ஏற்பட்டது. மின்வெட்டு அமுலாகுமா அமுலுக்கு வராதா என்ற கேள்விகளுடன் மக்கள் குழப்பத்துடன் காணப்பட்டனர்.
நான்கு வலயங்களாக பிரிக்கப்பட்டு மின்துண்டிப்பு முன்னெடுக்கப்படும் என நேற்று மாலை இலங்கை மின்சார சபையினால் விஷேட மின் வெட்டு பட்டியல் ஒன்று வெளியிடப்பட்டது. இந்த நிலையிலேயே
அந்த பட்டியல் அமுல் செய்யப்படாது என மின் வலு மற்றும் புதுப்பிக்கத்தக்க சக்தி அமைச்சர் ரஞ்சித் சியம்பலாபிட்டிய அறிவித்தார்
இது இவ்வாறு இருக்க அமைச்சர் மின் தடை ஏற்படாது என கூறிய போதும் நேற்று மாலையாகும் போதும், கம்பஹா மற்றும் கண்டி பகுதிகளின் பல பகுதிகளிலும் மின் வெட்டு மேற்கொள்ளப்பட்டதாக பொது மக்கள் தெரிவித்தனர்.
மின்சார சபையின் பட்டியல்
நாடளாவிய ரீதியில் தினமும் மூன்று மணி நேரம் மின் வெட்டினை அமுல் செய்ய இலங்கை மின்சார சபை தீர்மானித்துள்ளதாக முன்னதாக அந்த சபை விடுத்த அறிவித்தலில் குறிப்பிடப்பட்டது. கொழும்பு மா நகர சபையின் எல்லைக்கு உட்பட்ட பிரதேசங்களைத் தவிர நாடளாவிய ரீதியில் ஏனைய பிரதேசங்கள் ஏ, பி, சி, டி, என நான்கு வலயங்களாக பிரிக்கப்பட்டு இந்த மின் வெட்டு அமுல் செய்யப்படும். நேற்று நள்ளிரவு முதல் முதல் எதிர்வரும் மார்ச் 31 ஆம் திகதி வரை இந்த மூன்று மணி நேர மின் வெட்டு அமுலில் இருக்கும் எனவும் பகல் வேளையில் இரு மணி நேரமும் இரவில் ஒரு மணி நேரமுமாகாக மூன்று மணி நேரத்துக்கு ஒவ்வொரு வலயத்திலும் மின் வெட்டு அமுல் செய்யப்படும் எனவும் இலங்கை மின்சார சபை தெரிவித்திருந்தது. .
அதன்படி ஏ வலயத்தில் சேர்க்கப்படும் பிரதேசங்களில் ஒவ்வொரு நாளும் காலை 9.00 மணி தொடக்கம் முற்பகல் 11.00 மணி வரையிலும் பின்னர் மாலை 6.40 மணி தொடக்கம் இரவு 7.40 மணி வரையிலும் மின் துண்டிப்பு செய்யப்படும். பீ வலய பிரதேசங்களில் முற்பகல் 11.00 மணி முதல் பிற்பகல் 1.00 மணி வரையிலும் பின்னர் இரவு 7.40 மணி முதல் இரவு 8.30 மணி வரையிலும் மின் துண்டிப்பு செய்யப்படவுள்ளது. சி வலயத்துக்கு உட்படும் பிரதேசங்களில் பிற்பகல் 1.00 மணி முதல் பிற்பகல் 3.00 மணி வரையிலும் பின்னர் மாலை 6.40 மணி முதல் இரவு 7.40 மணி வரையிலும் மின் துண்டிப்பு செய்யப்படவுள்ளது. டி வலயத்துக்கு உட்பட்ட பகுதிகளில் பிற்பகல் 3.00 மணி தொடக்கம் மாலை 5.00 மணி வரையிலும் பின்னர் இரவு 7.40 மணி முதல் இரவு 8.30 மணி வரையிலும் மின் துன்டிப்பு செய்யப்படும் என மின்சார சபையினால் அறிவிக்கப்பட்டிருந்தது.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating